Kay chiri urqupa sunqunpi, llapa aylluykunapa wiqinpi hatun nanay qaparispa kawsayta mañakun. Chayna llakipa chawpinpim kay qillqa maytu puka waytachahina yana allpapa ukunmanta paqarispa chayaykamuwan. Kay qillqa maytupa sutinmi KILLAPA CHUKCHAN. Suma sumaq sutillanmi qayaykuwan. Hapiykuwaspanmi manana kachaykullawanchu. Manam atinichu sumaq sutinmanta lluqsiyta. Manam atinichu huklawman qawariytapas. Sumaq sutichanmi qistachahina qipichakuykullawan.
Taytanmi Javier Pariona Salvatierra. Paymi qillqaspa kimsa qipiman huñuykun: Yaku chukchacha, Killapa chukchan, Paqarina kawsaptin. Kimsanmi sumaqchalla sunqunman pusaykuwaspa sumaq harawinkunata musyayniypa ukunman chayaykachin.
Musyasqayman hinaqa, kay sumaq hatun harawikunapa sunqunpim kawsaypa sapinta lastapa sunqunpi tariykuni; ichaqa huk punchawchik allin sumaq kawsay yakuwan paqarina huñunakuykuspanku waytarinqaku. Achka yachaykunatam riqsiykuni rimayninpi. Ancha kuyakuynintapas tariykuni yakuray harawinpi.
Kananñataq hukchanta ñawinchaykusaq:
ISQUN SULLA
Asiynikim
llakiyta kusichin
llullu intihina.
Juan Luis Espinoza Chinchón
Runasimipi Qillqaq
Qapaq situwa, 2021